أريد اشتم هوه منكَع عبير وهيل
انه معلعل ودور عالنفس مبيوكَ
عثر بيه الحزن طشر ضحكتي اجروح
وانه بروحي سوالف تخنكَ المخنوكَ
رابي ويالدمع من جان عمري اكَماط
الفرح لابسلي حنضل ماكَدرنه انضوكَ
انه بروحي كَصب من احجي تسمع ناي
الوجع يكشخ بجرحي واني اشد اعلوكَ
جبته امشي عدل بس الوكت معــــووج
اشوف الناس خرسه بس نضرهه احلوكَ
انه بخــنكَة عطش ما جاملت للـــــماي
صرت ناعور جرفي واني طافح شوكَ
بقيت بعز رغـــم ماشالني العصــــــفور
انه صـــابر رغـــــم مابيه فـــحطت نوكَ
اليزكَيني ضحكه بروحي يطرد ضــــيم
انه دافن ضحكتي بصوت بس مفتوكَ
عشت محبس ذليل اكَبال جف مبتور
عشت موسم شتالة كَاع ما مرفوكَ
انه مسافر كصيبه افتهم حجي الليل
المبلل وجـــع غير السهر مـــيضوكَ
اريــــد ارتاح سير عـــندي ملك الموت
عشت خنكَة تراجي اعله الزلف مدكَوك
خلص عمري تعب حدما هدل مكفاي
ترى المحني ضهر عنده شريف الطوكَ
انه بعازة دفــــو ومستحقر الــــحطاب
اخافن عالحطب عندي كلب محروكَ
شسوالف ياكلب حسرات روحي اثكال
اخاف احجي بعد يصرخ جرح مخنوكَ